திங்கள், 17 ஜூன், 2013

குடிநீர் தயாரிப்பு நிறுவனங்களில் அதிகாரிகள் அதிரடி ஆய்வு


Capture
கடலூர் மாவட்டத்தில் உள்ள குடிநீர் தயாரிப்பு நிறுவனங்களில் மாவட்ட உணவுப் பாதுகாப்பு அலுவலர் எம்.பி.ராஜா தலைமையிலான அலுவலர்கள் குழுவினர் சனிக்கிழமை அதிரடியாக ஆய்வு நடத்தினர். அப்போது, உணவுப் பாதுகாப்பு தர நிர்ணய சட்டத்தை பின்பற்றாவிடில் கடும் நடவடிக்கை எடுக்கப்படும் என அலுவலர்கள் எச்சரித்தனர்.
கடலூர் மாவட்டத்தில் மாவட்ட உணவு பாதுகாப்பு அலுவலர் ராஜா தலைமையில் உணவு பாதுகாப்பு அதிகாரிகள் ரவிச்சந்திரன், நந்தகுமார் ஆகியோர் சனிக்கிழமை கடலூர் அருகே உள்ள கேப்பர் மலையில் குடிநீர் தயாரிக்கும் நிறுவனங்களில் திடீர் சோதனை மேற்கொண்டனர். அப்போது தண்ணீரின் தரம் நன்றாக உள்ளதா, சுத்தமாக, சுகாதாரமாக, பாதுகாப்பான முறையில் உள்ளதா என்பதை ஆய்வு செய்தனர்.
பின்னர் அங்கு வேலை செய்யும் தொழிலாளர்கள் தலையில் தொப்பி, கையுறை, சீருடை அணிந்து இருக்கிறார்களா என்பதையும் பார்வையிட்டு அவர்களுக்கு போதிய அறிவுரைகளை வழங்கினர்.
மேலும் தானியங்கி இயந்திரம் மூலம் பாட்டில் மற்றும் பாக்கெட்டுகளில் அடைத்து வைக்கப்பட்டிருந்த குடிநீரில் நுண் கிருமிகள் இருக்கிறதா என்பதை நவீன இயந்திரம் மூலம் ஆய்வு செய்தனர். குடிநீரின் மாதிரியையும் பரிசோதனைக்காக சேகரித்துக்கொண்டனர்.
இதுகுறித்து உணவு பாதுகாப்பு அலுவலர் ராஜா கூறுகையில், கடலூர் மாவட்டத்தில் குடிநீர் தயாரிக்கும் நிறுவனங்கள் பாதுகாப்பான, சுகாதாரமான முறையில் தரமான குடிநீரை தயாரித்து விநியோகம் செய்கிறார்களா என்பது ஆய்வு செய்யப்பட்டுள்ளது.
குடிநீரின் மாதிரியை சேகரித்து வைத்துள்ளோம். இதை சென்னை கிண்டியில் உள்ள அரசு பரிசோதனை கூடத்துக்கு அனுப்பி வைப்போம். பரிசோதனை முடிவு 14 நாட்களுக்குள் தெரியவரும். அதில் சுகாதாரமற்ற, தரமற்ற, பாதுகாப்பற்ற குடிநீர் விநியோகம் செய்வது தெரியவந்தால் சம்பந்தப்பட்ட குடிநீர் தயாரிக்கும் நிறுவனங்கள் சீல் வைக்கப்படும்.
குடிநீர் தயாரிக்கும் நிறுவனங்கள் குடிநீர் தயாரிப்பதற்காக எவர்சில்வர் குழாய்களைத் தான் பயன்படுத்த வேண்டும். உணவு பாதுகாப்பு தர நிர்ணய சட்டத்தை பின்பற்றாத குடிநீர் தயாரிக்கும் நிறுவனங்கள் மீதும் நடவடிக்கை எடுக்கப்படும்.
இதுவரை 5 குடிநீர் தயாரிப்பு நிறுவனங்களில் சோதனை மேற்கொண்டு குடிநீரின் மாதிரியை சேகரித்துள்ளோம். இந்த சோதனை மாவட்டம் முழுவதும் தொடர்ந்து நடைபெறும் என்றார்.

புதன், 12 ஜூன், 2013

உணவு பாதுகாப்பு அதிகாரிகள் எச்சரிக்கை


நெல்லிக்குப்பம்:நெல்லிக்குப்பத்தில் தடை செய்யப்பட்ட பான்பராக், குட்காவை உணவு பாதுகாப்புத் துறை அதிகாரிகள் பறிமுதல் செய்தனர்.தமிழக அரசு பான்பராக், குட்கா போன்ற போதை தரும் பொருட்களால் உடல் நலத்துக்கு தீங்கு ஏற்படுவதால் அவற்றின் விற்பனையை தடை செய்து உத்தரவிட்டது. ஆனால், அதன் பிறகு கள்ளச்சந்தையில் இப்பொருட்களின் விற்பனை அதிகளவு நடக்கிறது.கடலூர் மாவட்ட உணவு பாதுகாப்புத்துறை அதிகாரிகள் நேற்று நெல்லிக்குப்பம் கடைகளில் திடீர் சோதனையில் ஈடுபட்டனர். அப்போது கடைகளில் விற்பனைக்கு வைத்திருந்த தடை செய்யப்பட்ட பல ஆயிரம் மதிப்புள்ள பான்பராக், குட்காவை பறிமுதல் செய்தனர். முதல் முறை என்பதால் எச்சரிக்கை செய்கிறோம். இனி தடை செய்யப்பட்ட பொருட்களை விற்பனை செய்தால் கடுமையான நடவடிக்கை எடுக்கப்படுமென எச்சரித்தனர்.அதேபோல், ரஸ்னா, மோர் பாக்கெட்டுகளில் தயாரித்த நிறுவனம், தயாரித்த தேதியை கண்டிப்பாக குறிக்க வேண்டும் என தெரிவித்தனர்.

செவ்வாய், 4 ஜூன், 2013

கடலூர் நகரில் டிராக்டர்களில் குளோரின் கலக்காத குடிநீர் விற்பனை உணவு பாதுகாப்பு அதிகாரி கடும் எச்சரிக்கை


கடலூர் நகரில் டிராக்டர்கள் மூலம் விற்பனை செய்யப்படும் குடிநீரில் குளோரின் கலக்காததை உணவு பாதுகாப்பு அதிகாரிகள் கண்டுபிடித்து, டிராக்டர் டிரைவர்களுக்கு கடும் எச்சரிக்கை விடுத்தனர்.
குடிநீர் வினியோகம்
கடலூர் நகரில் ஒரு லட்சத்து 73 ஆயிரம் மக்கள் வசிக்கிறார்கள். இவர்களுக்கு நகராட்சி மூலம் நாளொன்றுக்கு 10 மில்லியன் லிட்டர் குடிநீர் வினியோகிக்கப்படுகிறது. ஆனால் இது மக்களின் குடிநீர் தேவையை பூர்த்தி செய்ய போதுமானதாக இல்லாததால் கேப்பர்மலையில் இருந்து டிராக்டர் டேங்கர்களில் கொண்டு வரப்படும் குடிநீரை பேரல் ஒன்றுக்கு 30 ரூபாய் வீதம் மக்கள் வாங்கி பருகுகிறார்கள். இவ்விதம் நகரில் நாளொன்றுக்கு சுமார் 100 டிராக்டர் டேங்கர் குடிநீர் விற்பனை செய்யப்படுகிறது.
இந்த குடிநீரில் குளோரின் கலக்கப்பட்டுள்ளதா? என்பதை கண்டறிவதற்காக நகரசபை தலைவர் சி.கே.சுப்பிரமணியன் தலைமையில் மாவட்ட உணவு பாதுகாப்பு நியமன அதிகாரி டாக்டர் ராஜா, அதிகாரி நல்லதம்பி, நகர்நல அலுவலர் டாக்டர் குமரகுருபரன் மற்றும் அதிகாரிகள் நேற்று காலையில் கேப்பர் மலையில் இருந்து குடிநீர் ஏற்றிக்கொண்டு வண்டிப்பாளையம் ரோட்டில் வந்த டிராக்டர்களை நிறுத்தி ‘குளோரோஸ்கோப்’ என்ற கருவி மூலம் குடிநீரை பரிசோதித்தனர். இந்த ஆய்வில் குடிநீரில் குளோரின் கலந்திராதது தெரியவந்தது. இதனால் டிராக்டர் டிரைவர்களுக்கு எச்சரிக்கை நோட்டீசுகளை உணவு பாதுகாப்பு அதிகாரி டாக்டர் ராஜா வழங்கினார்.
இது பற்றி அவர் கூறியதாவது:–
குளோரின் கலக்காமல்…
குடிநீர் மூலம் காலரா, வயிற்றுப்போக்கு, டைபாய்டு போன்ற நோய்கள் பரவுவதை தடுப்பதற்காக குடிநீரில் குளோரின் கலந்து வினியோகிக்க வேண்டும். அதாவது ஆயிரம் லிட்டர் குடிநீரில் 5 கிராம் குளோரின் கலக்க வேண்டும், இதை விட குறைவாக குளோரின் கலந்தால் கிருமிகள் சாகாது, அளவுக்கு அதிகமாக கலந்தால் அதை குடிப்பவர்களுக்கு வயிற்றுபோக்கு ஏற்பட்டு விடும். எனவே சரியான அளவில் குளோரின் கலக்க வேண்டும் என்று டிராக்டர் டிரைவர்களுக்கு அறிவுறுத்தி இருக்கிறோம்,
இது பற்றி இன்றைக்கு(அதாவது நேற்று) ஆய்வு செய்ததில் டிராக்டர் டிரைவர்கள் குளோரின் கலக்காத குடிநீரை கொண்டு வந்து விற்பனை செய்வது தெரியவந்துள்ளது, அவர்களுக்கு எச்சரிக்கை நோட்டீசு கொடுத்திருக்கிறோம், இதே தவறை மீண்டும் செய்தால் உணவு பாதுகாப்பு சட்டப்படி கடும் நடவடிக்கை எடுக்கப்படும் என்று எச்சரித்திருக்கிறோம்.
இவ்வாறு டாக்டர் ராஜா கூறினார்.

கடலூரில் விநியோகிக்கும் டேங்கர் லாரி குடிநீர் சுகாதாரமற்றது – ஆய்வில் அதிர்ச்சி தகவல் : தினகரன் செய்தி


கடலூர் நகரில் டேங்கர் லாரிகளில் வினியோகம் செய்யப்படும் தண்ணீர் சுகாதாரமற்ற நிலையில் வினியோகம் செய்யப்படுவது ஆய்வில் தெரியவந்துள்ளது. இதுதொடர்பாக 50 டேங்கர் லாரிகளுக்கு உணவு பாதுகாப்பு துறையினர் நோட்டீஸ் அனுப்பியுள்ளனர்.
மாவட்டத்தின் தலைநகராக உள்ள கடலூரில் வர்த்தக நிறுவனங்கள், ஓட்டல்கள், திருமண மண்டபங்கள் அதிகம் உள்ளன. இவற்றுக்கு அடிப்படை தேவையான குடிநீர் டேங்கர் லாரிகளில் வினியோகம் செய்யப்படுகிறது.
நாள்தோறும் 50 டேங்கர் லாரிகளில் சுமார் 2.5 லட்சம் லிட்டர் குடிநீர் வினியோகம் செய்யப்படுகிறது. இதற்காக கேப்பர் மலை பகுதிகளில் தனியார் போர்வெல் மூலம் தண்ணீர் எடுக்கப்படுகிறது.
தற்போது குடிநீர் தட்டுப்பாடு ஏற்பட்டுள்ள சூழ்நிலையில் பொதுமக்களும் டேங்கர் லாரிகளில் ஒரு குடம் நீரை 5 ரூபாய் கொடுத்து வாங்கி பயன்படுத்துகின்றனர். ஆனால் இந்த குடிநீர் சுகாதாரமற்ற நிலையில் உள்ளதாக புகார்கள் வந்தன.
இதையடுத்து நகராட்சி சேர்மன் சுப்பிரமணியன், மாவட்ட உணவு பாதுகாப்பு துறை அதிகாரி ராஜா தலைமையில் நகர்நல அலுவலர் குமரகுருபரன் மற்றும் அலுவலர்கள் நந்தகுமார், சுப்பிரமணியன் தலைமையிலான குழுவினர் கடலூர் வண்டிப்பாளையம் சாலையில் நேற்று டேங்கர் லாரிகளை மடக்கி திடீர் ஆய்வு நடத்தினர். அப்போது சுகாதாரமற்ற குடிநீர் வினியோகத்துக்கு கொண்டு செல்லப்பட்டது தெரியவந்தது. இது தொடர்பாக 50 டேங்கர் லாரிகளுக்கு எச்சரிக்கை நோட்டீஸ் அனுப்பப்பட்டது. மேலும் கேப்பர் மலை பகுதிகளில் உள்ள போர்வெல்களையும் குழுவினர் பார்வையிட்டு ஆய்வு நடத்தினர்.
இதுகுறித்து உணவு பாதுகாப்பு துறை அதிகாரி ராஜாவிடம் கேட்டபோது, தினந்தோறும் லாரிகளில் கொண்டு செல்லப்படும் தண்ணீர் பிளீச்சிங் பவுடர் போடாமல் கொண்டு செல்லக்கூடாது.
வாரம் ஒருமுறை இதுதொடர்பான அறிக்கை வழங்க வேண்டும் என எச்சரிக்கை விடப்பட்டுள்ளது.
கேப்பர் மலையில் உள்ள போர்வெல்கள் விவசாய பயன்பாட்டுக்கு இல்லாமல் குடிநீர் விற்பனைக்காக டேங்கர் லாரிகளில் ஏற்றிச்செல்வதும் தெரியவந்துள்ளது. இதுகுறித்து விசாரணை நடத்த உத்தரவிடப்பட்டுள்ளது என்றார்.

புதன், 22 மே, 2013

கடைகளில் காலாவதி உணவுப் பொருள்கள் பறிமுதல்-தினமணி செய்தி


கடலூர் பஸ் நிலையத்தில் உள்ள கடைகள், உணவகங்களில் அதிகாரிகள் செவ்வாய்க்கிழமை அதிரடி சோதனை நடத்தி, காலாவதி உணவு பொருள்களை கைப்பற்றி அழித்தனர். அதற்கு வியாபாரிகள் எதிர்ப்பு தெரிவித்ததால் பரபரப்பு ஏற்பட்டது.
கடலூரில் உள்ள உணவகங்கள், கடைகளில் தரமற்ற உணவு வழங்கப்படுவதாக பொதுமக்கள் புகார் தெரிவித்தனர். இதையடுத்து மாவட்ட உணவு பாதுகாப்பு அலுவலர் ராஜா தலைமையில் அலுவலர்கள் மற்றும் நகராட்சி அலுவலர்கள் செவ்வாய்க்கிழமை காலை, கடலூர் நகராட்சி பேருந்து நிலையம், சுற்றியுள்ள பகுதியில் உள்ள உணவகங்கள், பழக்கடைகள், பெட்டிக்கடைகளில் ஒரே நேரத்தில் ஆய்வு நடத்தினர்.
அப்போது சில உணவு விடுதிகளில், ஆபத்து விளைவிக்கும் கெமிக்கல் பேரல்களை சுத்தம் செய்து குடிநீர் நிரப்பி உள்ளனர். அதிகாரிகள் சோதனை நடத்தியபோது குடிநீரில் ரசாயனம் கலந்துள்ளது தெரியவந்தது. இதையடுத்து அந்த குடிநீரை வெளியே ஊற்றி பேரல்கள் கைப்பற்றப்பட்டன. சம்பந்தப்பட்ட உணவு விடுதிகளுக்கு எச்சரிக்கை நோட்டீஸ் அளிக்கப்பட்டது.
இதேபோல் பங்க் கடைகள், பெட்டிக்கடைகளின் முன்பு வெயிலில் கட்டி தொங்க விடப்பட்டுள்ள தண்ணீர் பாட்டில்கள், குளிர்பான பாட்டில்கள் அதிக வெப்பத்தால் கெட்டுப்போனதும் தெரியவந்தது.
அவற்றை கைப்பற்றி அழித்த அதிகாரிகள் கடைகளுக்கு எச்சரிக்கை நோட்டீஸ் அளித்தனர். மேலும் தடைசெய்யப்பட்ட வாட்டர் பாக்கெட், பிளாஸ்டிக் பொருள்கள், காலாவதியான குளிர்பான பாட்டில்களும் பறிமுதல் செய்யப்பட்டன.
அப்பகுதியில் நடைபாதைகளில் ஆக்கிரமிப்பு கடைகளையும் நகராட்சி ஊழியர்கள் அப்புறப்படுத்தினர். உணவு பாதுகாப்பு அதிகாரிகளின் சோதனைக்கு வியாபாரிகள் எதிர்ப்பு தெரிவித்ததால் பஸ் நிலைய பகுதி பரபரப்பாக காணப்பட்டது. கடந்தவாரம் இப்பகுதியில் தடைசெய்யப்பட்ட பான்பராக், குட்கா பொருட்கள் பறிமுதல் செய்யப்பட்டது குறிப்பிடத்தக்கது.

திங்கள், 13 மே, 2013

கடலூர் பஸ்நிலைய கடைகளில் உணவு பாதுகாப்பு அதிகாரிகள் அதிரடி சோதனை 11 வகையான பான்பராக், புகையிலை பொருட்கள் பறிமுதல்-தினத்தந்தி செய்தி



கடலூர்
கடலூர் பஸ்நிலைய கடைகளில் மாவட்ட உணவு பாதுகாப்பு அதிகாரி நடத்திய சோதனையில் பான்பராக், புகையிலை உள்ளிட்ட 11 வகையான பொருட்களை பறிமுதல்செய்தனர்.
கடலூர் பஸ்நிலையத்தில்
பான்பராக், புகையிலை பொருட்களை விற்பனை செய்ய தமிழக அரசு தடை விதித்தது. இருப்பினும் கடலூர் பஸ் நிலைய கடைகளில் சிலர் மறைமுகமாக விற்பனை செய்வதாக மாவட்ட உணவு பாதுகாப்பு அதிகாரிகளுக்கு ரகசிய தகவல் கிடைத்தது.
இதை அடுத்து மாவட்ட உணவு பாதுகாப்பு அதிகாரி டாக்டர் எம்.பி.ராஜா தலைமையில் உணவு பாதுகாப்பு அதிகாரிகள் நந்தகுமார்(கடலூர்), ஏழுமலை(பரங்கிப்பேட்டை), பன்னீர்செல்வம்(கம்மாபுரம்) ஆகியோர் கடலூர் பஸ்நிலையத்தில் உள்ள கடைகளில் அதிரடிசோதனை நடத்தினார்கள். அப்போது கடைகளில் தோரணம் போன்று தொங்கவிடப்பட்டிருந்த பான்பராக், புகையிலை பாக்கெட்டுகளை பறிமுதல் செய்து கடை உரிமையாளர்களையும் எச்சரித்தனர்.
நச்சுப்பொருள்
பின்னர் இது குறித்து உணவு பாதுகாப்பு அதிகாரி டாக்டர் எம்.பி.ராஜா நிருபர்களிடம் கூறும்போது பொதுமக்களிடம் இருந்து வந்த புகாரின் பேரில் இந்த சோதனை நடந்துள்ளது. பான்பராக்கில் போதைக்காக பொலோனியம்–6 என்ற கதிர்வீச்சு நச்சுப்பொருள் உள்ளது. இதை ஒருமுறை சுவைத்தவருக்கு மீண்டும் அதை சுவைக்க ஆசையை தூண்டும். அந்த அளவுக்கு சக்தி பான்பராக்கில் உள்ளது.
இதை வாயில் போட்டு சுவைப்பதால் வாய்ப்புற்று நோய் ஏற்படும். ஒரு கட்டத்தில் உதட்டை அசைக்க முடியாத நிலை ஏற்படும். மேலும் கடல் பகுதியானது செரிமான தன்மையை இழந்து விடும். எனவே பான்பராக், புகையிலை ஆகியவற்றை பொதுமக்கள் பயன்படுத்த வேண்டாம் என கேட்டுக்கொள்கிறோம். பொதுமக்கள் நலனை கருத்தில் கொண்டு இவற்றை விற்பனை செய்ய தமிழக அரசு தடை விதித்துள்ளது.
11 வகை பொருட்கள் பறிமுதல்
இதைத் தொடர்ந்து பான்பராக், புகையிலை பயன்பாட்டை ஒழிக்கும் பணியை இன்று(அதாவது நேற்று) முதல் தொடங்கி இருக்கிறோம். கடலூர் பஸ்நிலையத்தில் உள்ள கடைகளில் நடத்தப்பட்ட சோதனையில் தமிழக அரசால் தடைசெய்யப்பட்ட பான்பராக், புகையிலை உள்ளிட்ட 11 வகையான பொருட்களை பறிமுதல் செய்து அவற்றை அழித்து இருக்கிறோம்.
முதல் முறை என்பதால் சம்பந்தப்பட்ட கடை உரிமையாளர்களுக்கு எச்சரிக்கை விடுத்துள்ளோம். இந்த சோதனை கடலூர் மாவட்டம் முழுவதிலும் நடைபெறும். தொடர்ந்து தடை செய்யப்பட்ட பான்பராக், புகையிலை பொருட்களை விற்பனை செய்தால் சம்பந்தப்பட்ட நபர்களின் மீது சட்டப்படி நடவடிக்கை எடுக்கப்படும்.
கலப்பட டீ தூள்
ஏற்கனவே கடலூர் பஸ்நிலைய கடைகளில் கலப்பட தூள் கலந்த டீயை விற்பனை செய்வதாக வந்த புகாரின் பேரில் சோதனை நடத்தி கலப்பட தூள் கலந்து டீ விற்பனை செய்ததை கண்டு பிடித்து கடை உரிமையாளர்கள், ஊழியர்களை எச்சரிக்கை விடுத்துசென்றோம். தற்போது மீண்டும் அவர்கள் கலப்பட தூள் கலந்து டீ விற்பனை செய்வதாக புகார் வந்துள்ளது.
இனி இதுபோன்று கலப்பட தூள் கலந்து டீ விற்பனை செய்தால் அந்த கடையின் உரிமையாளருக்கு நோட்டீசு கொடுத்து, நடவடிக்கை மேற்கொள்ளப்படும்.
இவ்வாறு அவர் கூறினார்.

செவ்வாய், 23 ஏப்ரல், 2013

பஸ் நிலைய கடைகளில் காலாவதியான உணவுப் பொருள்கள் அழிப்பு-தினமணி செய்தி


கடலூரில் விற்பனை செய்யப்பட்ட காலாவதியான குளிர்பானங்களை அதிகாரிகள் கைப்பற்றி அழித்தனர்.
கடலூர் பஸ் நிலைய கடைகளில் பலர் காலாவதியான குளிர்பானங்கள், பிரட்கள் விற்பனை செய்வதாக புகார் வந்தது. அதையொட்டி மாவட்ட உணவுப் பாதுகாப்பு அதிகாரி ராஜா, கடலூர் நகர் நல அலுவலர் குமரகுரு ஆகியோர் பஸ் நிலையக் கடைகளில் சனிக்கிழமை சோதனை நடத்தினர்.
அங்கு பல கடைகளில் ரஸ்னா பாக்கெட்டுகள், காலாவதியான குளிர்பானங்கள், பிரட்கள் விற்பனை செய்வது கண்டுபிடிக்கப்பட்டது. மேலும் பல பொருள்கள், தின்பண்டங்களில் காலாவதியாகும் தேதி குறிப்பிடாமல் விற்பனை செய்வது கண்டுபிடிக்கப்பட்டது.
அதேப்போன்று பஸ் நிலையத்தில் உள்ள டீ கடையில் டீ தூளை சோதனை செய்தனர். அதுவும் கலப்படத் தூளாக இருந்ததால் அவற்றை கீழே கொட்டி அழித்ததுடன் எச்சரிக்கை செய்தனர்.

வியாழன், 18 ஏப்ரல், 2013

உணவு அதிகாரி ஆய்வில் காலாவதியான பொருட்கள் ஆற்றில் கொட்டி அழிப்பு


DSC00028
புவனகிரி:புவனகிரி பகுதியில் கடைகளில் உணவு பாதுகாப்பு அதிகாரி நடத்திய திடீர் சோதனையில் காலாவதியான பொருட்கள் அழிக்கப்பட்டது.
மாவட்ட உணவு பாதுகாப்பு அதிகாரி ராஜா தலைமையில் உணவு பாதுகாப்பு அலுவலர்கள்  குணசேகரன் , எழுமலை,ரவிச்சந்திரன் ,பத்மநாபன் ,நந்தகுமார்,அருண்மொழி ஆகியோர் புவனகிரி பகுதியில் உள்ள கடைகளில் திடீர் ஆய்வு நடத்தினர்.
அப்போது 25க்கும் மேற்பட்ட குளிர்பான கடை மற்றும் ஸ்வீட் ஸ்டால்களில் காலாவதியான குளிர்பானங்கள், வாட்டர் பாக்கெட்டுகள் மற்றும் தரமற்ற இனிப்பு வகைகள் பறிமுதல் செய்து, பேரூராட்சி டிராக்டர் மூலம் எடுத்து சென்றுச் வெள்ளாற்றில் கொட்டி அழிக்கப்பட்டது.
கடைகளில் காலாவதியான மற்றும் தரமற்ற பொருட்களை விற்பனை செய்யக்கூடாது எனவும், மீறி விற்பனை செய்வது கண்டு பிடிக்கப்பட்டால் கடும் நடவடிக்கை எடுக்கப்படும் என எச்சரிக்கை விடுக்கப்பட்டது.

ஞாயிறு, 14 ஏப்ரல், 2013

ரஸ்னா சாப்பிட்டு வாந்தி, மயக்கம் எதிரொலி: உணவு பாதுகாப்பு அதிகாரி அதிரடி சோதனை-தினமலர் செய்தி


14_04_2013_010_002_001 காட்டுமன்னார்கோவிலில் ரஸ்னா சாப்பிட்டு 6 பேர் வாந்தி மயக்கம் ஏற்பட்ட சம்பவத்தைத் தொடர்ந்து நேற்று மாவட்ட உணவு பாதுகாப்பு அதிகாரி திடீர் சோதனை நடத்தி காலாவதியான பொருட்களை பறிமுதல் செய்தார். காட்டுமன்னார்கோவில் அடுத்த தெற்கிருப்பு பகுதியில் உள்ள ஒரு பெட்டிக்கடையில் நேற்று முன்தினம் ரஸ்னா வாங்கி சாப்பிட்ட 4 குழந்தைகள் உட்பட 6 பேருக்கு வாந்தி மயக்கம் ஏற்பட்டு காட்டுமன்னார்கோவில் அரசு மருத்துவமனையில் அனுமதிக்கப்பட்டனர். இச்சம்பவத்தைத் தொடர்ந்து நேற்று காட்டுமன்னார்கோவில் பகுதி கடைகளில் மாவட்ட உணவு பாதுகாப்பு அதிகாரி திடீர் சோதனை மேற்கொண்டார். காட்டுமன்னார்கோவில் பஸ் நிலையம், கச்சேரி தெரு உள்ளிட்ட பல்வேறு இடங்களில் உள்ள பெட்டிக்கடைகள் மற்றும் வணிக நிறுவனங்களில் சோதனை மேற்கொள்ளப்பட்டது. இதில் காலாவதியான உணவு பொருட்கள், காலாவதி தேதி இல்லாத பாக்கெட் உணவுகள், பாக்கெட் குளிர்பானங்கள் ஆகியவை பறிமுதல் செய்து அழிக்கப்பட்டது. மேலும், டீ கடைகளில் கலப்பட டீ தூள் பறிமுதல் செய்யப்பட்டது. டீ கடைகள் மற்றும் குளிர்பான கடைகளில் சுத்திகரிக்கப்பட்ட குடிநீரை பயன்படுத்த வேண்டும். காலாவதியான உணவு பொருட்கள் இருப்பு வைக்கக் கூடாது. அனைத்து பாக்கெட் பொருட்களிலும் தயாரிப்பு தேதி மற்றும் காலாவதி தேதி குறிப்பிட்டு பொருட்களை விற்பனை செய்ய வேண்டும் என வியாபாரிகளுக்கு அறிவுறுத்தப்பட்டது. வட்டார மருத்துவர் சிவானந்தம், உணவு பாதுகாப்பு அலுவலர்கள் கொளஞ்சியான், நல்லதம்பி, ரவிச்சந்திரன், பன்னீர்செல்வம், சுப்ரமணியன், அருண்மொழி, சுகாதார மேற்பார்வையாளர் தம்பா உடனிருந்தனர்.

செவ்வாய், 19 மார்ச், 2013

உணவு பாதுகாப்பு அலுவலர்அலுவலகம் திறப்பு விழா-தினமலர் செய்தி



பண்ருட்டி:அண்ணாகிராம ஒன்றிய அலுவலகத்தில் உணவு பாதுகாப்பு அலுவலர் அலுவலகம் திறப்பு விழா நடந்தது.மாவட்ட உணவு பாதுகாப்பு அலுவலர் ராஜா தலைமை தாங்கினார். அண்ணாகிராமம் வட்டார உணவு பாதுகாப்பு அலுவலர் கந்தசாமி வரவேற்றார்.சிறப்பு விருந்தினராக அண்ணாகிராமம் சேர்மன் சுந்தரி முருகன் அலுவலகத்தைத் திறந்து வைத்தார். விழாவில் ஒன்றிய சேர்மன் சம்மந்தம், வட்டார வளர்ச்சி அலுவலர்கள் துரைசாமி, குமார், அலுவலக மேனேஜர் சதீஷ்குமார், ஆத்மா குழுத் தலைவர் ராஜேந்திரன் உட்பட பலர் பங்கேற்றனர்.

புதன், 6 மார்ச், 2013

நுகர்வோர் பாதுகாப்பு கூட்டம்-தினமலர் செய்தி



நெல்லிக்குப்பம்:நெல்லிக்குப்பம் நகராட்சியில் நுகர்வோர் பாதுகாப்புக் கூட்டம் நடந்தது.
சேர்மன் சுதாகர் தலைமை தாங்கினார். நுகர்வோர் பாதுகாப்புக் குழு கூட்டமைப்பு பொதுச் செயலர் மெய்யழகன், கண்ணன், பொறியாளர் இளஞ்செழியன், துப்புரவு அலுவலர் பரமசிவம், உணவு பாதுகாப்பு அலுவலர் ரவிச்சந்திரன் உட்பட பலர் பங்கேற்றனர்.
கூட்டத்தில், ஓட்டல்களில் தரமான உணவு வழங்க வேண்டும். விலைப்பட்டியல் வைக்க வேண்டும் நகராட்சி பகுதியில் சாலை ஆக்கிரமிப்புகளை அகற்ற வேண்டும். சுடுகாடுகளில் ஆக்கிரமிப்புகளை அகற்ற வேண்டும். அனுமதி இல்லாத இடங்களில் இறைச்சி விற்பனை செய்யப்படுவதைத் தடுக்க வேண்டும்.
கால்நடை மருத்துவர் பரிசோதனைக்கு பிறகே இறைச்சி விற்பனை செய்ய வேண்டும் என்பது உட்பட பல்வேறு தீர்மானங்கள் நிறைவேற்றப்பட்டன.

சனி, 16 பிப்ரவரி, 2013

நெய்வேலியில் அவலம்: கேள்விக்குறியாகும் உணவுப் பாதுகாப்பு-தினமணி செய்தி



நெய்வேலியில் உள்ள உணவகங்களில் விற்பனை செய்யப்படும் உணவுகள் கெட்டுப் போன நிலையில் மீண்டும் சூடாக்கப்பட்டு விநியோகிக்கப்படுவதால் பொதுமக்கள் உடல் நல உபாதைக்கு ஆளாகின்றனர்.
இது தொடர்பாக என்.எல்.சி. நகர நிர்வாக சுகாதாரத் துறை அண்மையில் உணவக உரிமையாளர்களை அழைத்து அவசர ஆலோசனை வழங்கி எச்சரிக்கையும் விடுத்துள்ளது.
என்எல்சி நகர நிர்வாகத்தின் கட்டுப்பாட்டில் உள்ள நெய்வேலி நகரியத்தில் நகர நிர்வாகத்தின் உரிமம் பெற்று 200 உணவகங்கள் செயல்படுகின்றன. இதில் சைவ மற்றும் அசைவ உணவகங்களும் அடங்கும். இந்நிலையில் அண்மைக்காலமாக உணவகங்களில் விற்பனை செய்யப்படும் உணவுப் பொருள்கள் தரமில்லாமலும், கெட்டுப்போன நிலையிலும் விற்பனை செய்யப்படுவதாக பரவலாக குற்றச்சாட்டு எழுந்தது.
குறிப்பாக அசைவ உணவகங்களில் விற்பனை செய்யப்படும் மாமிசங்கள் மீண்டும் மீண்டும் பதப்படுத்தப்பட்டு விற்பனை செய்யப்படுவதோடு, இட்லி, தோசைக்கு பயன்படுத்தப்படும் மாவுகள் புளித்த நிலையிலும், முதல் நாள் வடிக்கப்பட்ட சாதத்தை பயன்படுத்திய போக மிஞ்சிய சாதத்தை, இட்லி மாவு அரைக்கும் போது அவற்றுடன் சேர்த்து அரைத்து உணவு தயாரித்து வருவதாக புகார் எழுந்தது.
மேலும் வடை, பஜ்ஜி, சமோசா உள்ளிட்ட எண்ணெய் பதார்த்தங்களுக்கு மீண்டும் மீண்டும் அதே எண்ணெய்யை பயன்படுத்துவதால் உணவகத்தில் உணவு உண்ணும் பொதுமக்கள் உடல் நல உபாதைக்கு ஆளாக நேரிடுகிறது.
கடந்த 6 மாதங்களில் என்எல்சி மருத்துவமனையில் சிசிச்சைப் பெற்றவர்களில் 70 சதவீதம் பேர் உணவு தொடர்பாக நோய் ஏற்பட்டு சிசிச்சைப் பெற்றவர்கள் என்பது தெரியவந்துள்ளது.
இதையடுத்து என்எல்சி நகர நிர்வாக சுகாதாரத் துறையினர் நெய்வேலி நகரில் உள்ள உணவகங்களில் திடீர் ஆய்வு நடத்தியதில் மெயின்பஜார் மற்றும் எட்டுரோடு சந்திப்பில் உள்ள பிரபல அசைவ உணவகங்களில் கெட்டுப்போன மாமிசங்கள் பொதுமக்களுக்கு விநியோகிக்கப்படுவது கண்டுபிடிக்கப்பட்டுள்ளது.
மேலும் சில உணவகங்களில் புளித்த இட்லி மாவு, மீண்டும் மீண்டும் பயன்படுத்தப்பட்ட எண்ணெய் உள்ளிட்டவைகளைக் கண்டறிந்து, சம்மந்தப்பட்ட உணவகங்களுக்கு அபாரதம் விதித்துள்ளனர்.
இதன் விபரீதத்தை உணர்ந்த என்எல்சி நகர நிர்வாக பொதுமேலாளர் கே.சக்கரவர்த்தி, உணவக உரிமையாளர்களை அழைத்து பிப்ரவரி 8-ம் தேதி உணவுப் பாதுகாப்பும், நெறிமுறைகளும் எனும் தலைப்பில் உணவு மூலம் பரவும் நோய்கள், நீரின் மூலம் பரவும் நோய்கள் குறித்தும், அவற்றை தடுக்கும் முறைக் குறித்தும் ஆலோசனைகள் வழங்கினார்.
இது தவிர்த்து இனிப்புக் கடைகளில் கடைபிடிக்க வேண்டிய விதிமுறைகள், மீன் மற்றும் இறைச்சிக் கடைகளில் கடைபிடிக்க வேண்டிய விதிமுறைகள் குறித்த கையேட்டையும் வழங்கியுள்ளார். உணவுப் பாதுகாப்பில் அலட்சியம் காட்டும் உணவகங்களுக்கு அபராதம் மட்டும் தீர்வாகுமா? உணவுப் பாதுகாப்பின் அவசியம் அனைவரும் அறிந்ததே.
ஆனால் அவற்றை நம்மில் எத்தனை பேர் கடைபிடிக்கிறோம். உணவுப் பாதுகாப்பு மற்றும் தர நிர்ணயச் சட்டத்தின்படி உணவுக் கலப்படம் செய்தலுக்கு 10 ஆண்டுகள் வரை சிறை விதிக்க வாய்ப்புண்டு.  ஆனால் நெய்வேலி நகரில் உணவுப் பாதுகாப்பு விஷயத்தில் அலட்சியமாக நடந்து கொண்ட உணவக உரிமையாளர்களுக்கு அபராதம் மட்டும் தீர்வாகுமா?
இது குறித்து என்எல்சி சுகாதாரத் துறை அதிகாரிகளிடம் கேட்டபோது, "எங்களைப் பொறுத்தமட்டில் கெட்டுப்போன உணவு அல்லது கலப்பட உணவாக இருந்து கண்டுபிடிக்கப்பட்டால், அவர்கள் மீது நடவடிக்கை எடுக்கச் சொல்லி, உரிமம் வழங்கும் பிரிவுக்கு பரிந்துரைப்போம்.
உரிமம் வழங்கும் பிரிவினர் என்ன நடவடிக்கை எடுக்கிறார்களோ? அதில் நாங்கள் தலையிடுவதில்லை எனக் கூறிவிட்டனர்.
உணவகத்துக்கான உரிமம் வழங்கும் பிரிவினர்களோ ஒவ்வொரு முறைகேட்டுக்கும் அபராதம் எவ்வளவு என விதிக்கத்தான் எங்களுக்கு அதிகாரம் உள்ளது. அதையும் தாண்டி உரிமத்தை ரத்து செய்ய பரிந்துரைக்கலாம்.
மேற்கொண்டு எதுவும் செய்ய இயலாது என கைவிரித்துவிட்டனர்.
மாவட்ட உணவுப் பாதுகாப்புத் துறை அதிகாரி எம்.பி.ராஜா கூறுகையில், "மாவட்டத்தைப் பொறுத்தமட்டில் நகரம், ஒன்றியம், பேரூராட்சி வாரியாக 32 உணவுப் பாதுகாப்பு அலுவலர்கள் நியமிக்கப்பட்டுள்ளனர்.
ஆனால் நெய்வேலி நகரியம் மத்திய அரசு நிறுவனத்தின் கட்டுப்பாட்டில் உள்ளது. அங்கு, உணவுப் பாதுகாப்பு அதிகாரி நியமனம் குறித்து மாநில உணவுப் பாதுகாப்பு ஆணையத்துக்கு விண்ணப்பித்துள்ளோம்.  ஆணையத்தின் வழிகாட்டுதலுக்கேற்ப நெய்வேலி நகருக்கு என உணவுப் பாதுகாப்பு அதிகாரி நியமனம் செய்தவுடன் தவறு செய்வோர் மீது உணவுப் பாதுகாப்பு மற்றும் தர நிர்ணயச் சட்டப்படி நடவடிக்கை எடுக்கப்படும்’ என்றார் ராஜா.

ஞாயிறு, 3 பிப்ரவரி, 2013

தினந்தந்தி செய்தி எதிரொலி விருத்தாசலம் வாழைப்பழ குடோன்களில் உணவு பாதுகாப்பு அதிகாரிகள் அதிரடி ஆய்வு-தினத்தந்தி செய்தி


விருத்தாசலம்,
7 பேர் படுகாயம்
கடலூர் மாவட்டம் விருத்தாசலத்தில் உள்ள தீர்த்த மண்டப தெருவில் பழனிவேல் என்பவர் வாழை பழ குடோன் வைத்து தொழில் செய்து வந்தார். குடியிருப்புகளுக்கு இடையே அமைந்திருந்த இந்த குடானில் பழங்களை பழுக்க வைப்பதற்கென கார்ப்பைடு கல்லினை பயன்படுத்தியதால், கடந்த 30–ந்தேதி இரவு திடீரென வெடித்து சிதறியது.
இதில் குடோனினை ஒட்டி அமைந்திருந்த வீடு முற்றிலும் சேதடைந்தது. மேலும் இவ்விபத்தில் ஒரு 2 வயது கைக்குழந்தை உட்பட்ட 7 பேர் படுகாயம் அடைந்தனர். இது தொடர்பாக விருத்தாசலம் போலீசார் வாழைபழ குடோன் நடத்தியவர் மீது வழக்குப்பதிவு செய்து விசாரணை நடத்தி வந்தனர்.
செய்தி எதிரொலி
இதன் மூலமாக வாழைபழங்கள் பழுக்க வைப்பதற்கென கார்பைடு கல் பயன்படுத்தப்படுவது அம்பலமாகியிருப்பது தெரியவந்துள்ளது என்றும், இதனால் உண்டாகும் தீமைகள் என்ன என்பது குறித்தும் நேற்று தினந்தந்தி நாளிதழில் செய்தி பிரசுரம் செய்யப்பட்டது.
இதனை தொடர்ந்து நேற்று, கடலூர் மாவட்ட உணவு பொருள் மற்றும் மருந்து துறை நல அதிகாரி டாக்டர் ராஜா தலைமையில் நகர அலுவலர் நல்லதம்பி, கடலூர் ரவிச்சந்திரன், குறிஞ்சிப்பாடி சுப்பிரமணியன் ஆகியோரை கொண்ட அதிகாரிகள் குழுவினர் விருத்தாசலத்திற்கு நேற்று வந்தனர்.
ஆய்வு
தொடர்ந்து தீர்த்த மண்டபத்தில் வெடித்து சிதறிய குடோனை நல அதிகாரி டாக்டர் ராஜா தலைமையிலான அதிகாரிகள் பார்வையிட்டனர். அப்போது, அங்கு கார்ப்பைடு கல் வைத்து வாழை பழங்களை பழுக்க வைத்ததற்கான, ஆதரங்களை அதிகாரிகள் சேகரித்து சென்றனர். மேலும் அதே பகுதியில் வாழைபழங்களை பழுக்க வைக்கும், குடோன்களில் ஆய்வு செய்தனர்.
கடும் நடவடிக்கை
அப்போது டாக்டர் ராஜா கூறுகையில் வாழைபழங்களை பழுக்க வைப்பதற்கென கார்ப்பைடு கல்கள் பயன்படுத்தப்படுவதினால், தான் இதுபோன்ற விபத்துகள் ஏற்படுகிறது. இந்த வகை கல்களை பயன்படுத்தினால் அவர்கள் மீது கடும் நடவடிக்கை எடுக்கப்படும் என்று ஏற்கனவே எச்சரிக்கை செய்திருந்தோம். இருப்பினும் இதுபோன்ற நடவடிக்கைகள் சிலர் மறைமுகமாக ஈடுபட்டு வருகின்றனர். எனவே இனியும் இந்த நிலை தொடருமாயின், அவர்கள் கடும் தண்டனைக்கு உட்படுத்தப்படுவார்கள்.
இவ்வாறு கார்ப்பைடு கல்லினை வைத்து பழுக்க வைத்த பழங்களை உண்பவர்களுக்கு அஜிரண கோளாறு, புற்று நோய் போன்ற பல்வேறு நோய்கள் ஏற்படுவதற்கும் வாய்ப்புகள் உள்ளது. எனவே இதுபோன்று செயல்படுபவர்களை பொதுமக்கள் கண்டறிந்தாலும், அதிகாரிகளுக்கு தெரியப்படுத்தலாம் என அவர் தெரிவித்தார்.
அதிகாரியுடன் வாக்குவாதம்
விருத்தாசலத்தில் வெடித்து சிதறிய பழக்குடோனை உணவு பாதுகாப்பு அதிகாரிகள் பார்வையிட்டு விட்டு, மேலும் அங்கு மணிமுக்தாற்றில் உள்ள பழக்குடோனை ஆய்வு செய்வதற்காக சென்றனர். அப்போது அங்கிருந்த அதே பகுதியை சேர்ந்த ஒருவர், சம்பவம் நடைபெற்ற 3 நாட்களுக்கு மேல் ஆகிவிட்டது இன்று நீங்கள் வருகிறீர்களே? இதனால் என்ன பயன்? அடுத்தடுத்து அதிகாரிகளை பார்த்து கேள்வி கேட்டார்.
இதற்கு அதிகாரிகள் தரப்பிலோ நாங்கள் மாதந்தோறும் குடோன்களுக்கு சென்று பார்வையிட்டு எச்சரித்துதான் செல்கிறோம் என்றனர். மேலும் இதுபோன்று குடியிருப்புகளுக்கு உள்ளே குடோன் அமைந்துள்ளதை எங்களுக்கு நீங்கள் தெரியப்படுத்தினால், அவர்கள் மீது நடவடிக்கை எடுத்திறுப்போம் என்று அதிகாரிகள் தரப்பில் தெரிவிக்கப்பட்டது. இதனை ஏற்றுக்கொள்ளாத அந்த நபர் மேற்கொண்டு கேள்வி கேட்க ஆரம்பித்தார். இதனால் அங்கு வந்த அதிகாரிகளுகும், அவருக்கும் இடையே கடும் வாக்குவாதம் ஏற்பட்டு,சிறிது நேரம் பரபரப்புக்கு உள்ளானது.

திங்கள், 7 ஜனவரி, 2013

உணவுப் பாதுகாப்புச் சட்டத்தை எதிர்க்க வேண்டும்’-தினமணி செய்தி


உணவு பாதுகாப்பு தர நிர்ணய சட்டத்தை எதிர்த்து உணவு தானிய வணிகர்கள், உணவுப் பொருள் தயாரிப்பாளர்கள், உழவர்கள், நுகர்வோர்கள் ஒருங்கிணைந்து களம் இறங்கி போராட வேண்டும் என்று தமிழ்த் தேசிய பொதுவுடைமைக் கட்சி பொதுச்செயலாளரும், சிறுதொழில் முனைவோர் அமைப்பு ஆலோசகருமான கி.வெங்கட்ராமன் தெரிவித்தார்.
÷சிதம்பரத்தில் வர்த்தகர் சங்கம், சிறுதொழில் முனைவோர் அமைப்பு ஆகியவை இணைந்து வணிகம், தொழில், வேளாண் பாதுகாப்பு குறித்த பயிலரங்கத்தை ஞாயிற்றுக்கிழமை நடத்தின.
÷பயிலரங்கிற்கு வர்த்தகர் சங்கத் தலைவர் டி.டி.கே.பாண்டியன் தலைமை வகித்தார். 
சில்லறை வணிகத்தில் நேரடி அந்நிய முதலீடு குறித்து தமிழ் தேசப் பொதுவுடைமைக்கட்சி பொதுச்செயலாளரும், சிறுதொழில் முனைவோர் அமைப்பு ஆலோசகருமான கி.வெங்கட்ராமன் பயிலரங்கில் பங்கேற்று விளக்கவுரையாற்றினார்.
÷அவர் பேசியது: சில்லறை வணிகத்தில் அந்நிய முதலீட்டின் மூலம் சில்லறை வணிகத்திலிருந்து மண்ணின் வணிகர்களை வெளியேற்றும் திட்டத்தை மத்தியஅரசு அறிவித்துள்ளது.
÷தமிழகத்திலும், இந்தியாவின் பிற மாநிலங்களிலும் உள்ள சிறிய, நடுத்தர உணவு தானிய வணிகத்தையும், உணவு விடுதிகளையும், அடுமனைகளையும் (ரொட்டிக்கடைகள்), தேநீர் விடுதிகளையும், இறைச்சி வணிகத்தையும் உணவு பாதுகாப்பு மற்றும் தர நிர்ணயம் சட்டம் என்ற ஒரே ஒரு சட்டத்தை வைத்தே அடித்து நொறுக்க மத்தியஅரசு களம் இறங்கியுள்ளது. ÷சாலையோரக் கடைகளில் தொடங்கி மிகப்பெரிய அளவிலான சில்லறை வணிகர்களையும், சிறு உற்பத்தியாளர்களையும் மிகக்கடுமையாக இச்சட்டம் பாதிக்கும்.
÷இச்சட்டத்தை எதிர்த்து உணவு தானிய வணிகர்கள், உணவுப் பொருள் தயாரிப்பாளர்கள், உழவர்கள், நுகர்வோர்கள் ஒருங்கிணைந்து களம் இறங்கி போராடி இச்சட்டத்தை முறியடிக்க வேண்டும் என கி.வெங்கட்ராமன் தெரிவித்தார்.
÷உணவு பாதுகாப்பு மற்றும் தர நிர்ணய சட்டத்தினால் வணிகர் மற்றும் உழவர்களுக்கு ஏற்படும் பாதிப்புகள் குறித்து தமிழ்நாடு மளிகை வியாபாரிகள் சங்க பொதுச்செயலாளர் பண்ருட்டி ச.ராஜேந்திரன், தமிழ்நாடு உணவு பொருள்கள் வியாபாரிகள் சங்க ஆலோசகர் ரா.ராதாகிருஷ்ணன் ஆகியோர் உரையாற்றினர்.
÷பயிலரங்கில் வர்த்தகர் சங்க செயலர் பெரி.முருகப்பன், சிறுதொழில் முனைவோர் அமைப்பு நகர அமைப்பாளர் கு.சிவப்பிரகாசம் உள்ளிட்ட வியாபாரிகள் மற்றும் சிறுதொழில் முனைவோர்கள் பங்கேற்றனர்.